तुझे माझे मन

तुझे माझे मन - जणु यमुनेचे तीर
तुझी माझी प्रीत - वेणू वाजे मनोहर.

तुझे माझे मन - सारवले वृंदावन
प्रीत आपुली साजिरी - तुळशीची गं मंजिरी.

तुझे माझे मन - उंच निर्मळ गगन
तुझी माझी प्रीत - सूरसरितेचा स्त्रोत.

तुझे माझे मन - उमलले पद्मदळ
तुझी माझी प्रीत - दरवळे परिमळ.

तुझे माझे मन - रानीवनीचे हरीण
प्रीत आपुल्या अंतरी - मृगापोटीची कस्तुरी.

तुझे माझे मन - प्रतिभेचा दिव्य क्षण
तुझी माझी प्रीत - अलौकिक भावगीत.

तुझे माझे मन - गगनीचा कृष्णघन
तुझी माझी प्रीत - झरे भूवरी अमृत.

तुझे माझे मन - मन – फुलला मोगरा
तुझी माझी प्रीत – प्रीत – गुंफिला गजरा.

तुझे माझे मन - पाणी भरलेली मोट
तुझी माझी प्रीत - झुळुझुळु वाहे पाट.

तुझे माझे मन - ब्रह्म अनंत निर्गुण
तुझी माझी प्रीत - मूर्त साकार सगुण !