नंदाच्या पोरा तुझी रीत नव्हे चांगली

नंदाच्या पोरा तुझी रीत नव्हे चांगली
रे रीत नव्हे चांगली
सोड मला सोड, तुला भलती खोड लागली
रे भलती खोड लागली

एकटीला गाठुनिया धरलासी हात रे
पदराला झोम्बताना फोडीलासी माठ रे
लाडी गोडी पुरे तुझी, साडी माझी भिजली
नंदाच्या पोरा तुझी रीत नव्हे चांगली

वेळ आली काळी आज माझ्यावर पाळी
साजुक मी नार बाई नवी खुळी भोळी
खोड तुझी मोडणारी एक तरी भेटली
नंदाच्या पोरा तुझी रीत नव्हे चांगली

झाला बाई घात, तुझी वाजताच वेणू
अमृतात न्हाला माझा नाचे अणू रेणू
वेडी झाले वेडी, वेडी झाले गोविंदाची गोडी मला लागली
नंदाच्या पोरा तुझी रीत नव्हे चांगली

बेलभंडार

मंत्रतंत्र, भोंदूगिरी करणाऱ्या दुष्टात्म्याच्या कारवायांना बळी पडलेल्या एका दुर्दैवी स्त्रीची ही कहाणी. फसवून लग्न करून दिला गेलेला नवरा बाहेरख्याली. विवाहापूर्वीचे नायिकेच्या स्वप्नदृश्यातले कृष्णभक्तिमय गीत 'नंदाच्या पोरा तुझी रीत नव्हे चांगली', पतीभक्त नायिकेचे 'मी नंदनवनी फिरते' हे गीत, चंगीभंगी नवरा क्लबमध्ये जातो तेथील 'वय माझं सोळा, जवानीचा मळा' हे उडतं पाश्चिमात्य नृत्यगीत आणि 'माडीवर' जातो तेथील 'नका बोलू असे दूर दूर बसून' ही मदमस्त लावणी आणि एक अंगाईगीत अशी विविध गीते आठवले यांनी या चित्रपटासाठी लिहिली आणि संगीतकार दत्ता डावजेकर यांनी त्यांचं चीज केलं.