झोप घे रे चिमण्या सरदारा

झोप घे रे चिमण्या सरदारा
अंगाईच्या पदराखाली लपल्या अमृतधारा
झोप घे रे चिमण्या सरदारा

पोलादाची ज्यांची छाती
शिवरायाचे शूर सोबती
रणमर्दांच्या पायकुळी तुज जन्म लाभला वीरा
झोप घे रे चिमण्या सरदारा

लखलखता तेजाचा पुतळा
तशी तिकडची स्वारी बाळा
त्या तेजाच्या तालावरती माझा डौल पिसारा
झोप घे रे चिमण्या सरदारा

झोप राजसा आज सुखाने
उठ सकाळी हसतमुखाने
तूच एक आधार जिवलगा भार तुझ्यावर सारा
झोप घे रे चिमण्या सरदारा

बेलभंडार

मंत्रतंत्र, भोंदूगिरी करणाऱ्या दुष्टात्म्याच्या कारवायांना बळी पडलेल्या एका दुर्दैवी स्त्रीची ही कहाणी. फसवून लग्न करून दिला गेलेला नवरा बाहेरख्याली. विवाहापूर्वीचे नायिकेच्या स्वप्नदृश्यातले कृष्णभक्तिमय गीत 'नंदाच्या पोरा तुझी रीत नव्हे चांगली', पतीभक्त नायिकेचे 'मी नंदनवनी फिरते' हे गीत, चंगीभंगी नवरा क्लबमध्ये जातो तेथील 'वय माझं सोळा, जवानीचा मळा' हे उडतं पाश्चिमात्य नृत्यगीत आणि 'माडीवर' जातो तेथील 'नका बोलू असे दूर दूर बसून' ही मदमस्त लावणी आणि एक अंगाईगीत अशी विविध गीते आठवले यांनी या चित्रपटासाठी लिहिली आणि संगीतकार दत्ता डावजेकर यांनी त्यांचं चीज केलं.