जीवा, तुझ्या मोहिनीने भारले

जीवा, तुझ्या मोहिनीने भारले

उफाळूनी येती भाव चित्ती दाटले
जीवा, तुझ्या मोहिनीने भारले.

गूज मन्मनीचे केले खुले तुझ्यापाशी
तुझ्या अंतरीचे गूढ चित्ता नाकळे.

करी पुरी आशा, पदरी टाक वा निराशा
फिरायची मागे ही न आता पाऊले.

धरी शिरी अनुरागे, वा दुरी फेक रागे
सुको मुको प्राणा, पुष्प पायी वाहिले.

लपंडाव हा जिवाला गमे पापदायी
कधी व्हायचे हे उमाळे मोकळे?

माझा मुलगा

'माझा मुलगा' हा प्रभातचा सर्वस्वी सामाजिक, मध्यमवर्गीयांच्या नातेसंबंधांवरील कथा असलेले चित्र. या चित्रातील 'पाहू रे किती वाट' आणि 'उसळत तेज भरे गगनात' ही दोन गाणी शांता हुबळीकर यांच्या आवाजात लोकांच्या पसंतीस उतरली. 'उसळत तेज भरे गगनात' या गाण्याच्या वेळी त्या गाण्यात काय आशय हवा आहे हे आठवल्यांना सांगताना व्ही शांताराम म्हणाले होते की, "मला या गाण्यात एखादा बैरागी गातो तसं वर वर जाणारं, आभाळाला भिडणारं काही तरी हवं आहे!" 'पाहू रे किती वाट' यातील समुद्राच्या लाटा वर उसळल्याचा आभास उत्पन्न करणारे विलक्षण ताकदीचे संगीत लक्षणीय आहे.