बोलत नाही वीणा

बोलत नाही वीणा

दुर्दैवाने मुकी जाहली अमृतवाही रसना
बोलत नाही वीणा.

कुठले वादन तुटता तारा, कुठले सुस्वर काना
कुठले कूजन सोडूनी जाता कोकीळ हिरव्या राना
बोलत नाही वीणा

काष्ठाच्या कायेत अचानक सूर ओतिती प्राणा
त्या प्राणांचे सूर शोषणे व्यसन लागले मरणा
बोलत नाही वीणा

पडदा

लहानपणी मनात घर केलेले गंधर्व नाटक मंडळीतील वातावरण आणि बालगंधर्व आणि केशवराव भोसले यांच्या 'संयुक्त मानापमान'चा प्रयोग या पार्श्वभूमीवरील, नाट्यसृष्टीचे वैभव पडद्यावर आणणारा 'पडदा' हा चित्रपट आठवल्यांनी फिल्मिस्तानसाठी बनवला. पटकथा लिहिण्यासाठी त्यांनी त्यावेळी उदयोन्मुख असलेले प्रसिद्ध नाटककार बाळ कोल्हटकर यांना पाचारण केले. "सहज सोपी कविता मी शांताराम आठवले यांच्याकडे शिकलो" असे त्यांनी उद्गार काढले आहेत. त्यांनी लिहिलेल्या सर्व नाटकांचा अशी सहज सोपी कविता हा अविभाज्य घटक होता.

'पडदा' ही गायक अभिनेता आणि अभिनेत्री यांची अनोखी प्रेमकहाणी होती. चंद्रकांत आणि जयश्री गडकर हे त्या चित्राचे नायक नायिका होते. यातील आठवले यांच्या गीतांना राम कदम यांनी संगीत दिले होते. या चित्रपटाची एकच ध्वनिमुद्रिका मिळाली. त्यामुळे दोन गाणी 'बोलत नाही वीणा' आणि 'बंद जाहली दारे' ऐकता येतील. 'संगीत शाकुंतल' या नाटकातील बरीच गीते खास बालगंधर्वांच्या शैलीत या चित्रपटात सादर केली गेली होती.