शब्दांविण आळवीन !

उषादेवी, संध्याराणी उघडा गं अंतरंग
घेईन मी साठवून उमलते रस रंग.

गीत तुमचे खगांनो, येते सहज आतून
थोडेतरी तयातून मज घेऊ द्या स्फुरण.

पसरून गीतगंध, सुखविशी सकलांना
तुझ्यापासून पवना, मला घेऊ दे प्रेरणा.

फुले – नव्हे विकसल्या जणु सृष्टीच्या भावना
कोमलांनो कानी सांगा, भाव सौंदर्याच्या खुणा.

उसळत्या लहरींनो, तुम्ही नाचा थयथय
मनी मुरवू द्या मला सम, ताल आणि लय.

मध्यरात्री एकांतात, अंतरीच्या गाभाऱ्यात
शब्दांविण आळवीन माझे गोड भावगीत !