भाग्यरेखा

१९४२ सालच्या चळवळीतील भूमिगत क्रांतिकारकांचे खडतर साहसी जीवन, सामान्यांचा त्यांना मिळालेला सक्रीय, धाडसी पाठिंबा अशी राजकीय पार्श्वभूमी, भाकरी मोर्चा सारखे सामाजिक लढे, आदर्श, ध्येयनिष्ठ प्रेम, मोहाच्या क्षणातून उद्भवलेला कुमारी माता हा पेचप्रसंग आणि "निर्भयतेने जीवन जग" असा संदेश देणारे हे चित्र होते. पटकथा, गीते आणि दिग्दर्शन या जबाबदाऱ्या आठवले यांनी उचलल्या. केशवराव भोळे यांनी श्रीधर पार्सेकर या तरुण संगीतकाराबरोबर आठवल्यांच्या गीतांना संगीताने नटवले. शांता आपटे, बाबुराव पेंढारकर यांसारख्या कसलेल्या कलाकारांसोबत पु.ल.देशपांडे यांनीही या चित्रपटात भूमिका केली होती. तो त्यांचा दुसराच चित्रपट होता.

'भाग्यरेखा' हे चित्र "देव खरा आधार" ही संपूर्ण कुटुंब एकत्रपणे म्हणत असलेली गोड आणि अर्थपूर्ण प्रार्थना, 'माझ्या माहेरी सुखाची सावली ग' हे केवळ भाकरी थापत असताना आपटणाऱ्या हातांच्या तालावरचे साधे सुधे गीत, 'पाटलाच्या पोर जरा जपून जपून' हे खट्याळ प्रेमगीत, 'पाहिजे पोटाला भाकरी' हे क्रांतीगीत आणि 'वीरा झोप सुखे तू घेई' हे शांत अंगाईगीत अशा शांता आपटे यांच्या मधुर आवाजातील गीतांनी नटले होते.

या चित्रातील एका प्रसंगात महर्षी कर्वे आणि तात्यासाहेब केळकर हे दोन दिग्गज सहभागी झाले होते, महर्षी कर्व्यांनी एक छोटासा संवादही म्हटला होता.