राधिका चतुर बोले

राधिका चतुर बोले
'तुझी माझी प्रीत जुळे, कान्हा.'

चल, प्रीतिपंख पसरू, गगनी स्वैर फिरू
गिरिशिखर सागरांना लंघुनि मेघांना. नवलाख दिव्य रमणी, मंगलमय गाणी
आळविती गगनी
मधि कांत शांत हसरा, करिती फेर पुरा.

ही तेजाची गंगा, चल चल श्रीरंगा घालु इथे पिंगा
करू प्रेम अमर अपुले
तुझी माझी प्रीत जुळे, कान्हा
राधिका चतुर बोले

शेजारी

हिंदु मुसलमान ऐक्य या संवेदनशील विषयावरील 'शेजारी' या चित्रपटाच्या प्रत्येक गीतासाठी व्ही शांताराम यांनी अतिशय परिणामकारक प्रसंगांची निवड केली होती. "शब्दात जेवढे लालित्य, चित्रमयता आणि वैविध्य आणता येईल तेवढे आणा" अशी सूचना त्यांनी आठवल्यांना केली होती. मास्टर कृष्णराव यांच्याकडून आगळ्या वेगळ्या चाली काढून घेतल्या होत्या आणि बहारदार पार्श्वसंगीताची योजना केली होती. नायक नायिकांचे प्रेमप्रसंग खुलवणारी 'हासत वसंत ये वनी', राधिका चतुर बोले', अशी गोड प्रेमगीते आठवल्यांनी लिहिली. त्यात 'अलबेला; यासारखे अनवट शब्द वापरून ती खुलवली. 'लख लख चंदेरी तेजाची न्यारी दुनिया' हे मशालींचे नृत्यगीत तर अजरामर आहे. आजही, सत्तर वर्षांनंतर ते अनेक कार्यक्रमात सादर होते आणि नव्या गाण्यांहून जास्त गाजते. धरण फुटून प्रलय होतो. गाव वाहून जाते असे दृश्य खरे वाटावे म्हणून ही शांताराम यांनी खास प्रल्हाददत्त नावाचा स्पेशल इफेक्ट्सचा तज्ञ आणला होता. त्या प्रसंगानंतरचे 'सारे प्रवासी घडीचे' हे समूहगीत त्यातल्या अर्थपूर्ण शब्दांनी चित्रपटाचा शेवट वेगळ्याच उंचीवर नेऊन ठेवते.