मी नंदनवनी फिरते

मी नंदनवनी फिरते
जागेपणी अन् उघड्या नयनी
स्वप्न मधुर बघते
नंदनवनी फिरते.

धनुष्य भंगुनी विजयी झाला
घनश्याम मज राम भेटला
त्रैलोक्याच्या लावण्याचे
चरणकमल चुरिते
मी नंदनवनी फिरते.

निळ्या सागरा गंगा मिळली
रामाची मी निळी साउली
दासी होऊनी एकपणाच्या
सिंहासनी बसते
मी नंदनवनी फिरते.

पतिव्रतेला पती हा ईश्वर
कुरवंडीन मी प्राण तयावर
पतीच्या चरणी सुख स्वर्गीचे
सहज मला मिळते
मी नंदनवनी फिरते.

बेलभंडार

मंत्रतंत्र, भोंदूगिरी करणाऱ्या दुष्टात्म्याच्या कारवायांना बळी पडलेल्या एका दुर्दैवी स्त्रीची ही कहाणी. फसवून लग्न करून दिला गेलेला नवरा बाहेरख्याली. विवाहापूर्वीचे नायिकेच्या स्वप्नदृश्यातले कृष्णभक्तिमय गीत 'नंदाच्या पोरा तुझी रीत नव्हे चांगली', पतीभक्त नायिकेचे 'मी नंदनवनी फिरते' हे गीत, चंगीभंगी नवरा क्लबमध्ये जातो तेथील 'वय माझं सोळा, जवानीचा मळा' हे उडतं पाश्चिमात्य नृत्यगीत आणि 'माडीवर' जातो तेथील 'नका बोलू असे दूर दूर बसून' ही मदमस्त लावणी आणि एक अंगाईगीत अशी विविध गीते आठवले यांनी या चित्रपटासाठी लिहिली आणि संगीतकार दत्ता डावजेकर यांनी त्यांचं चीज केलं.