हवास मज तू हवास सखया

हवास मज तू हवास सखया

हृदयी माझ्या भाव उसळती
ओठावरती शब्द नाचती
रचावया परि कविता पंक्ती
हवास मज तू हवास रे.

भुलवित्ती खुलविती रसिक मनाला
सुमनांचा मी संचय केला
गुंफाया परी मोहक माला
हवास मज तू हवास रे.

असे कुंचली रंगही असती
धवल फलकही आहे पुढती
रेखाया परी रम्य आकृती
हवास मज तू हवास रे.

स्नेहही आहे, आहे पणती
मंदिरातल्या मूर्तीपुढती
उजळाया परि जीवनज्योती
हवास मज तू हवास रे.

दहा वाजता

'दहा वाजता' ही रोज रात्री दहा वाजता एकमेकांची आठवण काढण्याचा संकेत पाळणाऱ्या दोन प्रेमिकांची आगळी प्रेमकथा. या चित्रपटातील गीते आधी लिहिली गेली आणि नंतर चाली लावण्यात आल्या. त्यामुळे यातील सर्व गीतांच्या रचना उत्कृष्ट झाल्या आहेत. 'हवास मज तू हवास सखया', 'गोड गुपित कळलंय मला', 'तो म्हणाला, ती म्हणाली', 'चल थरकत मुरकत डौलात रे' या गीतांत गोडवा तर आहेच पण नाविन्यही आहे.

नायकाच्या गीतांसाठी सुप्रसिद्ध भावगीतगायक गजाननराव वाटवे आणि नायिकेच्या गीतांसाठी लीला पाठक यांनी पार्श्वगायन केले आहे. त्यामुळे गाण्यातील कृत्रिमपणा कमी झाला आणि शब्दोच्चार रसानुकुल आणि भावव्यक्ती परिणामकारक झाली आहे. ती खास भावगीते वाटतात. यातील 'तो म्हणाला, ती म्हणाली' या गीतावरून त्या चित्रपटाची जाहिरात 'तो आणि ती यांचे 'ते" अशी केली होती.