गोड गुपित कळलं मला

गोड गुपित कळलं मला, मला, गुपित कळलं मला

मांडव घाला करा तयारी, नवऱ्याला ही पसंत नवरी
मुहूर्त ठरवा चला, चला, गुपित कळलं मला.

नवरा नवरी सजवा मिरवा, जेवण घाला गाव बोलवा
खंडीचे लाडू वळा वळा, गुपित कळलं मला.

लाजू नको ग घास घाल ना
ऐका ऐका गोड उखाणा, करू नका गलबला

"समोरच्या कोनाड्यात ठेवले पेढे
अशोकपंत झाले प्रेमाने वेडे"
म्हणुनि भाळले हिला हिला, गुपित कळलं मला.

वहिनी माझी आशाराणी, मुला मुलींची गोजिरवाणी
सेना होवो तिला तिला गुपित कळलं मला.

दहा वाजता

'दहा वाजता' ही रोज रात्री दहा वाजता एकमेकांची आठवण काढण्याचा संकेत पाळणाऱ्या दोन प्रेमिकांची आगळी प्रेमकथा. या चित्रपटातील गीते आधी लिहिली गेली आणि नंतर चाली लावण्यात आल्या. त्यामुळे यातील सर्व गीतांच्या रचना उत्कृष्ट झाल्या आहेत. 'हवास मज तू हवास सखया', 'गोड गुपित कळलंय मला', 'तो म्हणाला, ती म्हणाली', 'चल थरकत मुरकत डौलात रे' या गीतांत गोडवा तर आहेच पण नाविन्यही आहे.

नायकाच्या गीतांसाठी सुप्रसिद्ध भावगीतगायक गजाननराव वाटवे आणि नायिकेच्या गीतांसाठी लीला पाठक यांनी पार्श्वगायन केले आहे. त्यामुळे गाण्यातील कृत्रिमपणा कमी झाला आणि शब्दोच्चार रसानुकुल आणि भावव्यक्ती परिणामकारक झाली आहे. ती खास भावगीते वाटतात. यातील 'तो म्हणाला, ती म्हणाली' या गीतावरून त्या चित्रपटाची जाहिरात 'तो आणि ती यांचे 'ते" अशी केली होती.