भारती सृष्टीचे सौंदर्य खेळे दावित सतत रूप आगळे

भारती सृष्टीचे सौंदर्य खेळे
दावित सतत रूप आगळे

वसंत वनात जनात हसे
सृष्टीदेवी जणु नाचे उल्हासे

गातात संगीत पृथ्वीचे भाट
चैत्र वैशाखाचा ऐसा हा थाट

ज्येष्ठ आषाढात मेघांची दाटी
कडाडे चपला होतसे वृष्टी

घालाया सृष्टीला मंगल स्नान
पूर अमृताचा सांडे वरून

गगनी नर्तन कृष्ण मेघांचे
भूतली मयूर उत्तान नाचे

श्रावणी पाऊस हास्याचा पडे
श्रीकृष्ण जन्माची दंगल उडे

बांधिती वृक्षांना रम्य हिंदोळे
कामिनी धरणी वैभवी लोळे.

कुंकू

जरठविवाह ही सामाजिक समस्या हाताळण्यासाठी चित्रपटाच्या तंत्राचा अत्यंत कुशलतेने वापर करुन व्ही शांताराम यांनी 'कुंकू' ही अप्रतिम कलाकृती दिग्दर्शित केली आहे. या चित्रपटातील 'अहा भारत विराजे' आणि 'भारती सृष्टीचे सौंदर्य खेळे' या दोन गाण्यात वाद्यमेळ वापरलेला नाही. तांब्यावर काठीने आघात करुन दिलेला ठेका आणि शांता आपटे आणि वासंती यांचे सहजसुंदर आवाज यांनी ही गाणी श्रवणीय झाली आहेत. ही दोन गाणी चित्रपटातील असून त्या काळातील शालेय पाठ्यपुस्तकात समाविष्ट करण्यात आली होती. 'मन सुद्ध तुझं, गोस्त हाये प्रिथ्वीमोलाची' हे मास्टर परशुराम यांच्या आवाजातील गाणे आजही लोकप्रिय आहे. व्ही. शांताराम यांनी या चित्रपटात Longfellow लॉंगफेलो या कवीची 'Psalm of Life' साम ऑफ लाईफ ही इंग्लिश कविता शांता आपटे यांच्याकडून एका एंग्लो इंडियन संगीततज्ञाच्या मार्गदर्शनाखाली गाऊन घेतली आहे. त्याच पद्धतीचे गीत आठवले यांनीही लिहिले. " विशाल हे विश्व भल्या बुऱ्यांचे, नसे फुलांचे नच कंटकांचे".